TORPÈ. Sos addòbios ammaniados dae su “Sòtziu tenores” torrant in s'arta Baronia. A pustis su de Pasada de su 15 de su mese coladu (in sa foto), sàbadu tocat a Torpè a acasagiare sos amantiosos de su cantu e de sa limba sarda. Sighende sos programmas de sas àteras biddas s'at a comintzare a mangianu. A sas 10 su Cussertu “Cùcuru 'e luna” at a ghiare unu laboratòriu cun sos dischentes de s'iscola. A sas 11,30 s'at a bisitare imbetzes su nuraghe Santu Predu. A borta de die una cunferèntzia cun duos argumentos. A pustis de sos saludos de abertura de Sarvadore Ghisu (Presidente Sòtziu tenores), de Antonella Dalu (Sìndigu de Torpè), Alberto Pala (Presidente Sòtziu Sardus Pater) e de Cristina Dalu (Presidente Sòtziu Sa Dea) s'at a faeddare de Juanne Lilliu e de sas chircas archeològicas in Baronia (cun sos archeologos Antoni Sànciu e Pàula Mancini e cun s'istòricu Italo Deledda) e de s'estètica de su tenore e de su sardu (“Cale est menzus” cun s'operadore linguìsticu Ànzelu Canu e su maistru de su Cunservatòriu de Casteddu Bustianu Pilosu). A sighire sos càntigos de sos tenores “Supramonte” de Orgosolo, “Santu Juanne” de Irgoli, “Su Càrminu” de Orune, “Su Hussertu” de Mamujada, “Cussertu Cùcuru ‘e Luna” de Torpè.